مسقعة الباذنجان بالفرن.....جامدة

تحياتى...
◦ღஓ jopaelromansy1 ஓ ღ◦°°

المقادير:
1حبة باذنجان رومى من الحجم الكبير جدا
احبة بطاطس كبيرة أو 2 متوسطة الحجم
6حبات فلفل أخضر رومى
2قرن فلفل أخضر حار
6 فصوص ثوم كبيرة
1بصلة كبيرة
عصير 7 حبات طماطم
2ملعقة صلصة طماطم جاهزة
1مكعب مرقة ماجى
ملح - فلفل اسود
ربع كيلو لحم مفروم
زيت ذرة
نصف كوب ماء


الطريقة:
أولا: هاتى طاسة متوسطة الحجم وحطى فيها شوية زيت واضيفى البصلة بعد تقطيعها الى ان يصبح لونها ذهبى وبعدين تضيفى اللحمة المفرومة وتقلبيها لحد ما تستوى وبعدين ترفعيها من على النار وتضيفيلها ملح وفلفل اسمر والفلفل الاخضر الحار بعد تقطيعه وتخليها على جمب

ثانيا: اعصرى الطماطم فى الخلاط وصفيها وحطيها تتسبك فى حلة على النار وخففيها بالماء وأضيفى مكعب مرقة الدجاج والصلصة ولما تحسى انها تقلت ارفعيها من على النار وسبيها على جمب

ثالثا: قشرى الباذنجان والبطاطس والثوم ونظفى الفلفل واغسليهم كويس وبعدين قطعى البطاطس حلقات والفلفل الى نصفين بالطول ثم بالعرض والباذنجان الى نصفين بالطول ثم حلقات ولو الباذنجان حجمه صغير يقطع الى حلقات بدون نصفين بالطول
وتجيبى طاسة كبيرة وتقلى البطاطس نصف قلية وكذلك الفلفل وحمرى الباذنجان وحطيهم فى مصفاة عشان الزيت اللى فيهم ورشى عليهم قليل من الملح

رابعا: هاتى صينية فرن متوسطة الحجم (يفضل البايركس)ورصى فيها نصف كمية حلقات البطاطس ثم نصف كمية الفلفل الرومى ثم نصف كمية حلقات الباذنجان واضيفى نصف كمية الثوم بعد تقشيره وتقطيعه الى حلقات ثم ضعى اللحم المفروم وصبى عليها ثلث كمية الصلصة السابق تحضيرها ثم ضعى باقى كمية البطاطس ثم الفلفل ثم الباذنجان ثم الثوم اللى هيكون نئ طبعا ثم باقى الصلصة

خامسا: دخليها الفرن بقى على اعلى درجة حرارة واستنى لما تتشرب من بعضها ولما تستوى قدميها ساخنة بالهنا والشفا مع أرز أبيض

ملحوظة: تكفى لأكثر من 6 أشخاص

وبالف هنا وشفا على قلبكم